文章
四個對音樂劇充滿熱誠o既人 - 王祖藍、羅敏莊、杜雯惠、湯駿業, 自組「過份音樂劇團」, 頭炮作品就係《壹團騷》, 大玩八十年代潮流, 將當年經典搬上舞台, 除o左音樂劇仲有點唱環節, 希望以互動形式同台下打成一片, 做一個不一樣o既音樂劇。
至於點解選擇八十年代, 身為今次導演o既王祖藍話全拜《三人show》所賜。「之前梁榮忠、羅敏莊同杜雯惠搞o左個《三人show》, 內容係講八十年代, 結果反應好好, 咁我o地覺得o的人可能仲未夠喉, 所以決定走呢條路, 將o個時一o的經典同電影橋段重現, 例如我o地會學《君子好逑》同《緣份》o係地鐵度識女仔, 相信大家到時一定會產生共鳴。」
值得一提是今次音樂劇能夠成事, 除o左四人同心合力之外, 仲要多謝兩個人, 佢o地就係劉德華同黃日華。「今次音樂劇o係資金方面多得兩個華仔幫手, 又同我o地搵贊助, 佢o地仲話公演時如果唔使出埠就一定o黎捧場添!」
